Aafluiperke

Door Moder Maas en Selfkantj
wie tweë riesjtartele ingesjnoord
in ’n korsèt
laog veur tweëhónderd jaor
de Limburgse leëuw aan ’t loergaat
saer jaor en daag is euver dae gróndj getrampeld
bie ’t landjsjtaeke mós me dèkser ’t lake lègke

Van hènje en wied-eweg
kaom me wirke in de koel
nao de koelsjtamp
oetgemirgeld, oetgekwetsj,
door ’n awdenkzeef gehaold
pès de vaarsjtieger, d’n Uul, vanoet ’t täöreke
de sjtieger deeg rouve
doe roukde de sjouw neet meë
sjtat in sjlam vasgezoek
mós me euver de päöl obbenuuts aan de brigke
mit sjtiel en sjtempel sjoefte
óm ónger wit gesjtiefde bäörd
en godvernäökde wètte oet te braeke
hónge vrouwluuj de sjolk aan de nagel
sjtónge aan de weeg van reageerbuuskènjer
van in d’n aolie op ’t waereldvriegezellecongres
nao duvelsgare, plastic en aetes oet d’n aolie
good gewasse van peuët en oare
van ’t zjwarte nao ’t witte goud

Lik ’t aan d’n awwer
wie-s te hóngs aan dat vawwere
hónger of rebelsj zónger
gesjeër sjräöm sjuve
euver de päöl pritsje
breer betale
egaal wie,
egaal wo
sjpoak dat sjpaor
óngerin ’n sjroapblik
sjuumke trèkke van de sjaor
van ’t Limburgse landj
en ’t water oet de Maas

(Gelaens)