Gelök inne brevebös

Oktoeaber 2017, het thema in deze maondj vanne geschiedenis is geluk. Is gelök ei produk van dezen tied, of zeen miense ummer bezig het gelök te vinje? Mien brevebös is ’n vervolgverhaol krek wie ‘Goede Tijden, Slechte Tijden.’ Bleuj en verval, bliedsjap en pien, riek en erm, werm en kaad, pech mer ouch gelök.
Ich krieg gemiddeldj pakweg ’n 30 folders reklaam inne waek. Det is in ein roew sjatting mieër dan 30 kilo pepier in e jaor. Veural väöl euver robuuste muibele van Leen de muibelebekker mit bankstèlle wobie ich ieës mien hoes mót verbouwen. Klopbaormesjiener en graasmesjiener mit accu, rolgerdiene, steigerplenk en parket. Mer ouch sanitair en laminaatvloere van Gamma, Praxis, Hubo, en Horbach. En väöl blome en plentjes oete volle gróndj volges Welkoop de Boerebóndj. Van Marskramer en Blokker boeteservies mit of zónger kóffiepot en vanne Hema modern óngerbókse en vrouljekleijer óm op te sjete. Ouch krieg ich goje raod óm inne zomerdaag zeker drie kieër te barbekjoewe mit aanmaakblökskes, houtskool, lektriese vlegemeppers of spuitbösse veur mögke en aomezeike. Vergaet neet diene metseslieper, laes ich geregeldj. Al gaon ich mit ’t broeadmets iene miene mutte lever nao Hendriks van der Putten… Bótrammetrummelkes heite noe sandwichbode. Doe mós dich ‘ne trimmer aansjaffe aan veur ’t trimme van geveulige deile van ’t lief. Kort veur ’t stumme, krieg ich väöl blinkendje blaedjes van CDA, PVDA, SGP, VVD, PVV, FvD, Henk en Denk. Of ei weekendje weg! Det ieëwige gezeik. Eder ’t zien en kanjer oppe trampoline. Volges de reklaam zuut half Nederlandj slech en is aan bède kenj douf. Doe kins väöl baeter huuere en zeen es se mitgedaon höbs aan ’t nationaal óngerzeuk bie Specsavers, Hans Anders en Schoonenberg of es se bie Eye Wish bös gewaes. Krieg ouch dök blaedjes inne brevebös van emes dae de rame wiltj kómme zeme of de sjaorstein wiltj vaege, wiewaal ich al jaore gein kaole mieë staok. Of emes dae inne haof wiltj wirke. Dök vraoge ze mich of ich de pos wil róndjbringe. Dan mót ich waal minimaal 16 jaor zeen. Es ich gaer boete bön is det ein ideaal baantje. Veur ich ’t inne gate höb is d’n daag óm en kin ich wiejer mit mien studie of hobby. Veer aete allang waat winkels zich allemaol bedinke. Ouch bie Aldi Appie, Lotto Jumbo, Plus Eurootje en de riedel vanne Lidl. Gei water oete kraan mer döbbel fris brónwater van Spa en Bar Le Duc mit of zónger smaekske. Super lekker vers. Väöl korting en nörges gojekouper. Op=Op. Sjips, neutjes, Snelle Jelle, Grand Italia en Hak, Hak, Hak mit soep en knak van Unox en snacke mit Snickers. Kratte beer van Alfa Amstel, Hertog Jan Bavaria, BrandGrolsch Jupiler en Radler in halve literflessen. En es se einmaol dien droumkeuke höbs dan is ’t zunj óm dao in te kaoke. Dus hup de frietkäetel inne graasj en de res vaerdig koupe. Gemarineerdj Italiaans hoonderevleis van sjerhoonder en sjer-eier mit rindjslepkes. Slaaj mit geitekieës. Vijver schnitzels, muesliböl mit reziene of Indische röbbe mit piri piri en alles van kapitein Iglo, Heinz Honig, Carl Heinrich Theodor Knorr en Julius Maggi. Allemaol veure smaak en ’t gemaak. Mer veural veur hieël väöl geluk. Mer noe nag de gezóndjheid van die zoeagenaamdje natuurlijke produkte. En neuraal minder, minder, minder… zaat, kunstmatige aroma’s, E-nummers, smaakversterkers, kluuerstóffe, vèt, sókker en conserveringsmiddelen. Natuurlik wil ich bieblieve en wete waat d’r speeltj in dezen tied. Ich gaon d’r dan ouch ummer ‘ns good veur zitte en laes alles waat inne brevebös terech kump. Want waem sjik dich op vandaag nag e kaertje of ‘ne breef? Behalve die vanne belasting.

Geef een antwoord

Het e-mailadres wordt niet gepubliceerd.