Mit miene maedjesnaam sjrief ich mich Mia Kurvers en nao ’t trouwe koom dao van Wegberg väör. Gebaore en getaoge in Ech in ein sjoestersgezin. Mien vader en moder wirkdje hel in de wirkplaats en sjoonwinkel óm häör 6 kènjer ordentelik graot te brènge. Det is häör good gelöktj. Al lang bön ich moder van twieë kènjer en oma van vief kleinkènjer. Ich höb zevenentwintig jaor gewirktj op de speciale basissjoal “De Horst” in Ech es administratieve krach. ’n Bezunjere baan wo ich nag stieëds mit väöl plezeer aan terök dènk.

Óngertösse gepensioneerdj en mit miene man perbeer ich te genete van alles waat op ós paad kömptj.
Väöl vrieje tied geit op aan leuke dènger zoaes: bloomsjikke, volleyballe, organisere, vastelaovendj, femielie en noe ouch aan sjvieve. Zeve jaor geleje höb ich de cursus laeze en sjrieve van Veldeke Krink Ech gevolgdj bie Piet Aben. Nao ’t sjrieve van ’t meisterstök vroog m’n mich èns te gaon kieke bie de Sjrieverskrink Midde Limburg. Vanoet ’t make van verslage, leedjes en Sinterklaosgedichjes -mit name in ’t Echter dialek- woor ich waal nusjieërig nao die “club”. Ich wól waal aanwiezinge en advieze óm det waat ich wól vertèlle zoa sjoan mäögelik op te sjrieve. Dao lieër ich nag stieëds van. In fantasieverhaole kèn ich mich richtig oetlaeve en det doon ich ’t leefste. In inkele Platbeuk staon d’r ’n paar. Ongertösse bön ich zoa wuud det ich durf te sjrieve waat ich veul en vènj ónger angere in columns. Ich perbeer daoróm ouch noe mit ’n actueel thema ’n biedrage te levere aan dit programma van Torna Cultura.

De Sjrieverskrink Midde-Limburg (SML) is ’ne informele krink van 10 ambitieuze amateursjrievers mit es doel in de Limburgse taal, mit al zien versjille, te sjrieve, zich óngerein dao-in mit goje raod te óngersteune en zich neet hove te sjenere.
De SML is vrieblievendj en volledig ónaafhankelik van de vereniging Veldeke en haet ouch geine officiële status es stichting of vereniging. Daonaeve zeen waal weer twieë leden van de SML lid van ’t hoofdbestuur van Veldeke.

De SML is, mit alle waardering en respek, neet verantwaordelik veur activiteiten en publicaties die lede privé samestèlle, presentere en organisere.
Alle lede zeen lid van ein of mieë kringe van Veldeke en de SML wuuertj geregeldj gevraog óm aan activiteite van kringe mit te doon.Werk van lede van de SML zeen op persuuenlike titel te laeze in Platbook,Veldjbekèt,Veldjgewas en in versjillende waekblajer in de regio. Óm lid te waere van de SML zeen gein eise gestèldj aan laeftied en/of woonplaats. Vanzelfspraekendj mótte de lede ’n redelijke oetdrökkingsvaardigheid in de Limburgse taal höbbe, zoeawaal sjriftelik es ouch mondeling.

De lede van de SML kómme (es regel) edere twieëdje zaoterdig vanne maondj bie-ein in kefee ’t Heukske in St.-Joeas. De maondje juli en augustus zeen fekansiemaondje.

Meistal spraeke veer ’n oetdagendj thema aaf óm euver te sjrieve. Det kintj ’n gedich zeen, ’n kort verhaol, e sprookje of ’ne column. Die wèrkstökke waere ’n aantal daag veure bie-einkóms aan alle lede gestuurdj en oppe bie-einkóms beurtelings veurgelaeze en van opboewendj commentaar veurzeen.

Thema’s wore de aafgeloupe periode o.a.: zintuiglik sjrieve (veule, zeen, ruke, huuere en preuve), vrieheid/ónvrieheid, kirmes, sprookjes, humor, en vriejen tied. In de loup van de jaore zeen veer óngerein de versjille in spelling en oetspraok gaon waardere. Veer maken ós waal, mit respek, attent op pertinente spellingsfaelers, ónnuuedige herhaolingen, stopwäördjes en ‘Hollandisme’.

De bedoeling is óm in de verhaole en gedichte euver ’t laeve de wörkelikheid mit aksie sjoeaner en sterker te make. ’t Geit veural óm spele mit taal en orginaliteit.