Chocolaad

Ich bèn zès jaor. Staon in de kuueke
te kieke wie moder in de panne reurtj
en wach braaf toet zie mich de lieëpel geuftj
óm aaf te lekke.

Daomèt maaktj zie mich altied blie.
’t Kèlle oetsjerre huuertj ouch d’rbie –
det suiske bie bloomkoeal, spinazie of vleis
is vuuer mich gewuuenweg fieës!

Ouch de garde stiefgeklopdje eiwitsjoem –
minseleef… lek vinger, lek doem!
Mer wètj gae waat…? ’t Blieste bèn ich
mèt eine aafleklieëpel chocolaad!

Jao…, das war einmal es kleine jóng –
ich kiek nao dae tied mèt wieëmood óm.
Sóndigs huuerdjes se al van ver
de iesverkuiper mèt zien witte ker.

Allewiel lek ich van ’ne Magnum aan zoea’n stekske,
lieëpel de chocolate mousse oet ’n bekske,
drink werme chocomel mèt ‘ne klodder slaagroum –
den belaef ich weer daezelfdje droum.

Want gae kóntj óngerhandj waal raoje…
vuuer chocolaad bèn ich neet te haoje.

Ich haoj van mèlk, van puur, mer ouch van wit.
En van karamel mèt zieëzaot vuuer get extra pit.
Eine Bossche bol bie ’n tas espresso, cappuccino of thieë –
ich zèk ‘t uch… ich lös d’r waal twieë!

Altied dankbaar óm te kriege en te gaeve es cadeau
zoea’n assortiment van Leonidas of Rousseau:
bónbóns, pralines, truffels… ’n pak repe van Merci,
Verkade, Milka, Van Houten of Tony Chocolonely.

Eine Mars, Twix, Nuts, KitKat of Milky Way…
tössedoor get snaje vinj ich prima en oké.
Ze ligke bie de kassa vuuer ‘t griepe op vandaag –
ich kan d’r neet van aafblieve es ich ’t zègke maag.

Zoea zeentj gae…: ich bèn ein en al gesmikkel
ouch sónger Willy Wonka ziene gouje wikkel.

En zooj ’t oeat zoeawied kómme –
geluif mich mer… echwaor:
den völ ich mien noeadpakket
vol mèt repe van Côte d’Or!